LAOAG CITY – Personal a nagturong ni Department of Education Secretary Sonny Angara iti Banga National High School idiay South Cotabato ita nga aldaw, Setiembre 19 kalpasan ti insidente ti pammaltog iti pagadalan tapno mangidaulo dagiti insigida nga aksion ken pannakaipaay ti tulong kadagiti pamilya a naapektaran ken kadagiti dadduma pay.
Iti ibibisita ti Sekretario, nakitaripnong daytoy kadagiti staff ti pagadalan, nagannak, dagiti lider ti lokal a gobierno ken pulisya para iti pannakabukel ti emergency response, pannakaipaay kadagiti kritikal a psychological service ken tapno maresolbar dagiti pangta ti seguridad ti lugar.
Malaksid kadaytoy, ininspeksion pay ti Sekretario ti mismo a pagadalan, nakipagpaset daytoy iti security briefing ken debriefing session para kadagiti mangisursuro ket dadduma pay a personnel.
Mainaig iti daytoy, nagkiddaw ti Department of Education kadagiti opisial ti Barangay ken kadagiti tanod para iti kanayunan a suportada kadagiti police patrol, aglalo kadagiti pagadalan nga awan ti kabukbukodanda a security guard.
