LAOAG CITY – Kinarit ti agdama nga National Bureau of Investigation (NBI) Director Melvin Matibag nga agipila iti kaso ni Davao City First District Representative Paolo “Pulong” Duterte kontra iti asawana a ni Ann Matibag no addaan daytoy ti ebidensiya.
Ti nasao a karit ket namunganay ti panagkuestionar ni Duterte kadagiti proyekto ti Laguna First District nga irepresentar ti asawa ni Matibag iti lower chamber.
Inbatad ni Duterte nga adda iggemna a bideo mainaig kadagiti proyekto ti asawa ni Matibag ken dagiti Discaya.
Segun kenni Matibag, no addaan ni Duterte iti ebidensiya a saan a naggapo ti vloggers, ket mangipila daytoy iti kaso ta maimbestigaran iti asawana.
Innayon na pay a ti imbestigasion ti NBI mainaig kadagiti ghost ken substandard a flood control projects ket saan a mapilpili. Daytoy ket kalpasan a kinuna ni Duterte a saan kuma a mapilpili ti imbestigaran ti ahensia.
Maipalagip a, nakitaan ti NBI iti red flags ti 47 a proyekto ti flood control manipud iti 100 a proyekto iti umuna a distrito ti siudad iti Davao.
