LAOAG CITY – Naireklamo ti maysa a mangisursuro iti ili ti Dingras kalpasan a maipagarop nga iniggaman na ti mabagbagi ti maysa nga adalan na a Grade 7 a lalaki.
Segun iti biktima, inranta ti mangisursuro nga iggaman ti magbagbagi na bayat nga adda iti classroom.
Inlawlawag ti ubing nga iti panag-practice da ti doxology ket inayaban ti mangisursuro isuna a mapan iti likudan a paset bayat nga adda iti uneg ti classroom ken ditoy a maipagarop nga iniggaman ti maseknan ti mabagbagi na.
Inbatad ti biktima a ginandat pay ti mangisursuro nga iggaman manen ti mabagbagi na iti maikadwa a gundaway ngem nagtalawen iti nagtakderan na.
Immuna iti daytoy, kuna ti ubing nga itay kallabes ket pinaayaban ti mangisursuro isuna a mapan iti bakante a classroom ngem saan a nagtungpal.
Kabayatanna, inbatad dagiti saanen a nagpabigbig a mangisursuro iti pagadalan a kinasarita da a mismo a maestro ket ditoy nga inbatad ti maseknan a saan na nga inranta ti pasamak.
Kabayatanna, inbatad ti principal nga agaramid da ti report seknan iti pasamak ken maisubmitir ti report iti DepEd Division Office ken maidanon pay iti Regional Office.
Inlawlawag ti principal nga ummunan nga inbatad ti mairekreklamo a mangisursuro nga ag-resign tapno saanen a dumakkel ti isyu ken saan a mairaman ti pagadalan.
Kuna ti principal a sakbay ti napasamak ket addan ti rekomendasyon na nga agikkat ti maestro gapo ta maipagarop a saan na a maar-aramid ti responsibilidad na iti pagadalan nangruna iti paper works.
Naamoan pay a sipud napasamak ti alegasyon kontra iti mangisursuro ket saan pay a nagreport iti pagadalan.
