LAOAG CITY – Naideklara a dead on arrival iti Dingras Distict Hospital ti maysa a lalaki kalpasan a nadisgrasya iti national highway a paset ti Bgy. 21. San Marcos iti ili ti Sarrat.
Nabigbig ti lalaki a ni AJ Arce agtawen iti 55, agpapaay iti Small Town Lottery (STL) iti ili ti Dingras ken residente iti Bgy. Banaoang iti ili ti Bantay, probinsiya ti Ilocos Sur.
Basar iti PNP Sarrat, nakalugan ni Arce iti motorsiklo na ket bayat nga agpapaabagatan a direksiyon iti nasao a paset ti kalsada ket nakasinnabat na ti maysa nga Isuzu Fuego nga inturong ti agnagan iti Joselito Balinong agtawen iti 34, ken residente iti Bgy. 12 San Bernabe iti ili ti Sarrat.
Dita a napasamak ti disgrasya a maipagarup a nakadungparan ti driver ti Isuzu fuego ti biktima.
Rumrumuar a na lost control ti driver ti isuzu fuego ti manibela ti lugan na bayat nga adda iti kurbaan a paset ti kalsada.
Insigida met a simuko ti driver ti Isuzu Fuego iti PNP-Sarrat.
