LAOAG CITY – Maluksaw ni Mr. McArthur Ramoran iti ili ti Bacarra iti kapadasan da iti Bacarra Medical Center kalpasan nga intaray da ti anak na a nagkombulsyon.
Segun kenni Ramoran, iti parbangon ket nagkombulsyon ti anak na isut gapo na nga intaray da iti nadakamat nga ospital ngem maipagarop a saan nga inawat ti ospital.
Inlawlawag na nga idi inbaga da nga agasawa nga agkombulsyon ti anak da ket maipagarop nga inpetteng ti nurse a nakasarita da a saan da nga agaw-awat ti pasyente nga aggurgurigor.
Nasakit ti nakem ni Mr. Ramoran gapo ta uray first aid laeng kuma ti naipakat ngem awan pulos ken maipagarop nga inrikep ti nurse ti tawa ti information section.
Gapo iti panagnerbyos da nga agasawa ket intaray da ti anak da iti ospital iti ili ti San Nicolas.
Mainaig iti daytoy, desidido ti pamilya Ramoran a mangipila ti reklamo tapno maimbestigar ti napasamak ken saanen a maulit ti napasamak.
Kabayatanna, ikarkarigatan met ti Bombo Radyo a maalaan ti komento ti nadakamat nga ospital.
