LAOAG CITY – Naireklamo ti maysa a lalaki gapu ti maipagarop a papanna panagprobokar ti balay da Elena Eugenio ken pinang-or na ti ulo ti anak na a ni Jaymar Eugenio, agtawen iti 32, residente dagitoy iti Barangay 6, San Juan, San Nicolas, Ilocos Norte.
Gapu ti daytoy, naitaray ti ubing a Eugenio iti Governor Roque Ablan Senior Memorial Hospital (GRASMH) ditoy ciudad ti Laoag para ti naan-anay a pannaka-agas na idinto a ti suspek a ni Edison Mamuad, agtawen iti 35, awanan ti asawa ken residente met laeng ti nasao a barangay ket naipakustodyar iti PNP-San Nicolas.
Segun ti report, bayat ti panagprobokar ni Mamuad ket rimuar ti ubing nga Eugenio tapno mapan na anawaen ti suspek ngem maipagarop a pinang-or na daytoy.
Iti eksklusibo nga interview ti Bombo Radyo Laoag ken ni Mamuad, inadmitir na a napan nagprobokar iti balay da Eugenio ngem inpasingked na a saanna a pinang-or ni Jaymar.
Inlawlawag na a kinagura na ti panangsingir kenkuana ti ina nga Eugenio gapu ta adda ti utang na nga arak iti tianggi da nga agdagop amin iti 2 ribo a pisos.
Inbatad na a kayat na koma nga in-inutan a bayadan ti utang na isut gapuna a kinagura na ti panangsingir kenkuana ti ina nga Eugenio.
