LAOAG CITY – Inburay ti maysa nga embalsamador ti kapadasan na a naidumduma bayat ti panagembalsamar na.
Segun kenni Mr Aladin dela Cruz, agtagikua ti maysa a punenarya, bayat nga adda iti embalming room ket adda ti naangot na a kaang-angot ti dama de noche uray awan ti mula iti uneg ti kuarto.
Inbatad na a nakarkaru ti banglo ti nasao a mula ngem ti formalin nga us-usaren da.
Malaksid iti daytoy, kuna ni Dela Cruz a no dadduma ket adda ti maiagarup nga aniniwan nga aglabas iti ayan na.
Nupay kasta, kuna na a saan na a panpansinen dagiti madmadlaw na tapno saan a mabuteng.
Mainaig iti daytoy, inbatad ni dela Cruz a kasarsarita na dagiti bangkay nangruna dagiti mapaltogan partikular ti panagbirok na iti bala nga adda iti uneg ti bagi ti bangkay.
Inbatad na a ti kangrunaan nga ibagbaga na kadagitoy ket ti panagkiddaw na a saan da a parigaten daytoy a mangbirok ti bala.
