LAOAG CITY – Natay ti maysa a babai kalpasan a nagbekkel iti mismo a balay da iti Barangay Ester, Vintar, Ilocos Norte.
Binigbig ni Police Major Joseph Baltazar, ti chief of police iti ili a Vintar, ti biktima a ni Arcelita Gamiao, agtawen ti 32, naasawaan, taga San Isidro, Claveria ngem naikamang iti nasao a barangay.
Segun ken ni Baltazar, ti biktima ket agsagsagaba ti depresyon ken adda ti maintenance na.
Innayon na a basar ti asawa ti biktima ket nabayagen ti panagsagsagaba ti depresyon ni Gamiao gapu ta balasang pay laeng daytoy idi agmen-maintenance.
Naulila ti biktima ti asawa ken dua nga annak na nga agpada nga adda pay laeng iti elementarya.
Kuna pay ni Baltazar a saan nga inpagarop ti asawa ti biktima nga agpakamatay daytoy gapu ta idi malem ket nakaragragsak ti asawa na a nangawat ti sweldo na a napan nagraep.
