LAOAG CITY – Pinaltogan ti pulis ti maysa nga indibidual iti ili ti Pasuquin kalpasan a ginandatna a darupen daytoy kabayatan a nakaiggem ti buneng.
Daytoy ti kinumpirmaran ni P/Maj. Johnveil Maramag, Hepe ti Pasuquin Municipal Police Station.
Nabigbig ti suspek a lalaki nga awanan ti trabaho ken residente iti ili ti Pasuquin.
Basar iti inisyal nga imbestigasion, kabayatan ti panagpatrolya dagiti kameng ti pulisia ket ginandat ti suspek a tagbaten ti luganda a police patrol.
Gapu iti daytoy, kuna ni P/Maj. Maramag a linisian dagiti otoridad ti nasao a suspek a nangitunda met ti pannakaidungparda iti maysa a lugan nga Hillux.
Inlawlawagna a pinadas nga anawaen dagiti maseknan a pulis ti suspek ngem darupenna met dagitoy a tagbaten rason a pinaltoganda ti sakana.
Kunana a dagiti met laeng nakalugan a pulis ti nangitaray ti supek iti Rural Health Unit iti ili ti Pasuquin para iti pannakatamingna.
Iti agdama, saan pay a nakasarita dagiti otoridad ti suspek a manamnama a mapilaan daytoy ti kaso.
