LAOAG CITY – Dead on arrival iti Mariano Mariano Marcos Memorial Hospital ti maysa a tricycle driver kalpasan a nadungpar iti maysa a Partas Bus iti Brgy. Bil-loca iti siudad ti Batac.
Daytoy ket gapu ta nadungpar ti tricycle babaen ti ag-overtake a van a minaneho ni Roman Martin Pablo Jr., agtawen ti 31 ken taga La Trinidad, Benguet.
Binigbig ni Police S/Insp Samson Amistad, Deputy Chief of Police iti Batac City PNP ti pimmusay a ni Rommel Bolo, a taga Brgy Dariwdiw iti nasao a siudad ken nangiturong ti tricycle for hire.
Nabigbig met ti driver ti Partas bus a ni Joey Tawili Llanares ken taga Bauang, La Union.
Segun ti imbestigasyon, agpa-amianan ti Van ken tricycle idinto nga agpabagatan a direksyon ti Partas bus.
Kuna ni Amistad nga ag-overtake ti van ngem idi ta nabatog na ti tricycle ket nadungpar na ti likod ti tricycle.
Gapu iti daytoy, nagpuligos ti tricycle agingga a napan iti bangir a lane rason a nadungpar ti agpapaabagatan a Partas bus.
Innayon ni Amistad nga agtultuloy ti imbestigasyon iti nasao a pasamak.
