LAOAG CITY – Inlawlawag ni Dr. Rodrigo Catcatan, ti mangidadaulo iti City Health Office ditoy ciudad ti Laoag no kasano iti panangkita a nasayaat dagiti umili iti gatgatangen da nga Anti-Rabies Vaccine tapno maamoan no peke wenno saan.
Daytoy ket kalpasan nga adda dagiti report manipud iti Department of Health nga adda dagiti agwarwaras a peke nga anti-rabies vaccine.
Segun kenkuana, sakbay da nga itudok ti nagatang ti patiente iti ruwar nga anti-rabies vaccine ket masapol a kitaen da nga umuna iti listaan ti reference number iti vials.
Kunana nga adda ti inted kadakuada ti Department of Health a pagkitaan kadagitoy tapno masigurado a saan peke dagiti maitudok kadagiti patiente.
Kabayatanna, nagballaag ni Catcatan kadagiti umili a gumatang kadagiti botika tapno masigurado a saan a peke dagiti magatang da ken kangrunanan saan a mairisgo iti biag dagitoy.
