LAOAG CITY – Inbatad ni Barangay Chairman Elviro Agoo iti Barangay Davila iti ili ti Pasuquin nga ituloy da latta nga isumitir ti signature campaign da kontra iti Ilocos Norte Electric Cooperative (INEC).
Daytoy ket iti baet a napan kinataripnong ida dagiti kameng ti INEC kalpasan nga inrubwat da ti signature campaign da.
Segun ken ni Agoo, saan da a napnek iti nagbalin a palawag ti pannakangiwat ti INEC a ni Mr. Noel Andres.
Innayon na a saan na pay a nasungbatan ti saludsud dagiti kabarangayan na a member-consumers mainaig iti sweldo ni General Manager Herbert “Bing” Agdigus.
Inpalgak na nga uray ti saludsud no patungan ti INEC ti angkaten da a kuryente ket saan a nasungbatan dagiti maseknan.
Kuna pay ti kapitan nga ituloy da nga isumitir ti signature campaign da iti opisina ni Governor Matthew Marcos-Manotoc, Congressman Sandro Marcos, senado ken dadduma pay a maseknan nga opisina.
