LAOAG CITY – Nasakit ti nakem ni Mr. Sean Lorenzo, agtawen ti 16 ken residente iti Brgy. Calluza iti ili ti Piddig ti pannakadangran na babaen kadagiti pulis kangrunaan ti hepe iti nasao nga ili.
Segun ken ni Lorenzo, magmagna da iti kasinsin na a mapan koma agbuya ti basketball iti Gaki Theater idi rabii ti domingo.
Kuna na a dita a narana da ni hepe PLt. Rudy James Jacalne.
Inbatad na nga iniyaban ni Jacalne ken nagsalusod nu nakainom ti nasanger daytoy, banag nga inadamitir na iti hepe.
Inpakaammo ni Lorenzo a bayat ti panagtugtugaw na iti uneg ti tricycle ket dita a nga inturong ti hepe ti paltig na kageddan ti panangidalged na iti batog ti rusok na.
Mainaig iti daytoy, inbatad na nga apaman a nakadanon da iti stasyon ti pulisya ket sinabat ti binigbig na a ni police officer Bolusan.
Kuna na a dita a kinasarita na ken sinaludsod na ti pagnanaedan na ken kalpasan na ket tinulpak na.
Innayun na a malaksid iti mismo nga ima ni Bolusan a panangdisso na kenkuana ket intulpak pay ti pulis dagiti barya a naggapo iti bulsa na pakairamanan ti cellphone na.
Inpakaammo pay ti menor de edad a ti aritos na ket ginarsot ni Bolusan kageddan ti panangibaga na nga aramiden na daytoy tapno marsing ti lapayag na ken kalpasan na ket inpadeg na pay.
Inbatad na a malaksid iti inaramid ni Boluson iti uneg ti stasyon ti PNP-Piddig ket inpataya ti hepe ti ima na ken dita a binaot na ti arnis.
Immuna iti daytoy, inpakaammo ni Lorenzo a nagkiddaw da iti na na a maipadalan iti medico legal ngem arig nga adda ti panagkedked ti kapulisan ken naipalubos laeng kalpasan ti sumagmamano nga oras.
Inadmitir na nga addan ti immuna a nakainaigan na a panagbakal gapu ta nairamraman laeng iti aramid dagiti kakadua na.
Nu pay kasta, inpetteng na a saan a nakikabil iti dayta nga aldaw gapu ta naggapo laeng iti Brgy. Buboy nga isu ti naggi-inoman da ken napan iti balay da iti Brgy. Calluza tapno akpakada sakbay ti panaturong da iti Gaki Theater.
Inadmitir na nga addaan met ti ikot a balisong tapno adda ti mausar na para iti self defense.
Rimuar met iti medico legal ni Lorenzo a positibo iti contusion, left maxilla pakairamanan ti mild hyperemia and swelling of both palm and wrist.
Kabayatanna, bayat ti pannakainterview ti menor de edad iti Bombo Radyo Laoag ket adda ti pannakaalarma na gapu ta adda dagiti napan nagturong a pulis iti balay da.
