LAOAG CITY – Temporaryo a mapaserraan ti merkado publiko ditoy ciudad ti Laoag.
Basar iti inparuk-at nga Executive Order (EO) ni Mayor Michael Marcos-Keon, agepekto ti pammilin na intono tengnga ti rabii ken agngudo met intono tengnga ti rabii ti Mayo 9 ita a tawen.
Inparuk-at ti mayor ti nasao a pammilin kalpasan nga adda dagiti nagpositibo ti covid-19 nga aglaklako iti tiendaan.
Naamoan a tallo amin dagiti nagpositibo ti covid-19 nga aglaklako iti merkado publiko ditoy ciudad ti Laoag.
Kabayatanna, inbaga ti maysa a kargador iti tiendaan ditoy ciudad ti Laoag a ni Mr. Onyok a saanda pay a napakaammoan no amin da nga agtrabtrabaho iti merkado publiko ket dumalan ti swab test.
Innayon na a lima nga aldaw nga awan ti pagtrabahoan ken pamastrekan da.
Ibilang met ni Mr. Romani Andres a ti sumagmamano nga aldaw a pannakapaserra ti tiendaan ket dakkel ti mapukaw da.
Naamoan a nakigtot laengen dagiti agtrabtrabaho iti tiendaan idi maipakaammo kadakuada nga aglockdown pay laeng ti merkado publiko gapu ta adda dagiti nagpositibo ti covid-19 nga aglaklako.
