LAOAG CITY – Inbatad ni Dr. Shirley Agrupis, Presidente ti Mariano Marcos State Universiry (MMSU) a nabayagen nga isagsaganaan da ti pannakaipatungpal ti face to face classes kadagiti sumagmamano a degree programs.
Segun kenni Agrupis, karaman kadagiti insagana da ket ti vaccination, physical arrangement iti klase ken dadduma pay.
Daytoy ket gapo ta ti laeng rakurak ti Malakanyang wenno panangaprubar ni Presidente Rodrigo Duterte ti inuray da tapno maipatungpal daytoy.
Inlawlawag na a dakkel a tulong kadagiti estudyante ti face to face classes kadagiti sumagmamano a degree programs kangrunaan na iti technical skills, pangta iti kalidad ti edukasyon ken dadduma pay.
Kunana nga uray kasano ti panangisuro babaen iti kabroan a teknolohiya ket narigat latta gapo ta dagiti dadduma a degree programs a kasapulan a mapan iti laboratoryo.
Mainaig iti daytoy, kunana nga iti biang met ti salun-at dagiti estudyante, ar-aramiden da met amin tapno mabakunaan amin dagitoy sakbay da nga agsubliti iti unibersidad.
Dinakamat na nga ado metten dagiti ummunan a nabakunaan kontra iti covid-19.
Gapo iti daytoy, patyen na a nakasaganan ti unibersidad para iti pannakaipatungpal ti face to face classes.
