LAOAG CITY – Namnamaen ti maysa a sociologist nga adda ti dua a parte ti covid-19 pandemic a sigurado a maysa kadagiti topiko ti maikalima a State of the Nation Address ni Presidente Rodrigo Duterte.
Segun kenni Mr. Herdy Yumul, sociologist iti Mariano Marcos State University (MMSU), ti ummuna a parte ket ti agsentro iti naaramidan ti administrasyon iti daytoy a pandemya ken ti maikadwa ket ti recovery plan.
Inbatad na a kalikagom na a mangeg iti recovery plan ti gobierno dagiti wagas a tapno makaukkon ti pondo gapo na kanayon a maibagbaga nga agkurkurang ti pondo para iti covid response.
Malaksid iti daytoy, kayat pay ni Yumul a mangegan nga irakurak kuma ni Presidente Duterte a masapol a maituloy ti Build Build Build Program tapno adda ti pagtrabahoan dagiti tattao.
Maysa pay a kalkalikagoman ni Yumul nga inbaga ti presidente no anya ti ibati na kadagiti Pilipino apaman a malpas ti termino na malaksid laeng laeng iti war on drugs.
