LAOAG CITY – Kinondenar ni Miss Levy Jane Molina, ti dati nga empleado iti 1st District Congressional Office ti inruar nga statement ni Ilocos Norte 1st District Rep. Sandro Marcos.
Daytoy ket kalpasan nga inakusaranda isuna a karaman isuna kadagiti empleado ken dadduma pay nga indibidual tapno makakalap ti pondo para iti bukod na a pagsayaatan iti laksid a ti trabaho na laeng ket para dalus.
Inbatadna a saan met a ni Cong. Sandro ti binabalaw na iti video nga inpost na online.
Segun ken Molina, inikkatda isuna iti trabaho gapu ta maipagarup nga adu dagiti ammu na seknan iti operasyon ti nasao nga opisina.
Kunana a nabayagen a masinsintir na dagiti saan a maiparbeng nga aktibidad dagiti empleado iti 1st District Congressional Office, maysa ditoy ti pannagkissay kadagiti ayuda nga ipapaay kadagiti umili.
Adu dagiti agipatpatulod ti mensahe kenkuana nga agingga ita ket adu latta ti baliktad nga ububraen ti nasao nga opisina.
Kunana a kalpasan a na-ipost ti video ket kiniddaw ti sumagmamano nga empleado iti nasao nga opisina nga i-delete na daytoy, ngem inpettengna a saan gapu ta ususto met amin nga inrakurakna.
Mainaig iti daytoy, inpettengna nga awan ti pakainaigan na ti sakit nakem na iti nasao a pangopisinaan iti pulitika.
Kabayatanna, kalikagom ni Ms. Molina a makasarita ni Congressman Sandro tapno mailawlawag na a nasayaat ti takder na.
Kageddan iti daytoy, inpetteng ni Vice Mayor Rey Carlos Fariñas nga awan ti pakainaiganna iti maris pulitika iti panangtulongna ken ni Miss Levy Jane Molina. Innayonna a nakasagana iti opisinana a tulungan ni Molina no agkiddaw manen daytoy ti tulong kenkuana. Naammoan a nagserbi ni Molina iti Bise Mayor idi bulan ti Setiembre iti agdama a tawen.
