LAOAG CITY – Nai-lockdown dagiti sumagmamano a barangay iti ili ti Solsona gapo iti kaadda ti kaso ti covid-19.
Basar iti FB page ti lokal a gobierno ti Solsona, karaman kadagiti barangay a nailockdown ket ti Bubuos, Capurictan, Nalasin, Sitio Natayag iti Manalpac ken ti Lipay malaksid iti Sitio Poder.
Malaksid iti daytoy, temporaryo pay a nairikep ti municipal hall ken Rural Health Unit iti nasao nga ili.
Dagiti met amin a tourist destinations iti nadakamat nga ili ket karaman kadagiti saan pay laeng a malukatan.
Immapela met ti lokal a gobierno a liklikan ti panagiwaras ti saan a beripikado nga impormasyon seknan iti daytoy.
Maipalagip a kellaat ti panagado ti kaso ti covid-19 iti ili ti Solsona iti napalabas nga aldaw.
