LAOAG CITY – Insigida a nagresponde dagiti kameng ti Bureau of Fire Protection ken Philippine National Police iti maysa a tanem iti Mangato Public Cemetery kalpasan nga adda iti naawat da a report mainaig iti maur-uram a picture frame gapu kadagiti kandila a nakasindi.
Segun ken Senior Fire Officer II Eligio Garcia, usar ti fire extinguisher ker dagus a nasebseban daytoy ken saanen a nagramram nangruna ket adda ti kurtina ti tanem.
Inlawlawag na a napanawan ti kandila ken inreport dagiti tattao nga adda iti abay ti tanem isut gapo na a dagus da a nakapagresponde.
Mainaig iti daytoy, nagballaag isuna kadagiti agturturong ti kamposanto a saan a baybayan a nakasindi ti kandila lalo nu adda iti kaabay dagitoy a mabalin pamunganayan ti uram.
