LAOAG CITY – Agpada a pimmusay dagiti dua a beautician kalpasan a naidungpar ti nagluganan da a motorsiklo iti poon ti kayo iti national highway bisinidad iti Barangay Peralta, Dingras, Ilocos Norte.
Nabigbig dagiti biktima a da Jay-em Duldulao, agtawen iti 29, driver ti motorsiklo, taga Barangay Manayun iti ili a Sarrat ken ti inlubbon na a ni Joven Javier, agtawen iti 34, awanan ti asawa ket taga Sta. Ana, Cagayan.
Iti imbestigasyon ti PNP-Dingras, bayat ti panagpadpadaya a direksyon dagiti biktima ket maipagarop a nataray ti motorsiklo isut gapuna a napukawan ti kontrol ti driver a nagresulta iti pannakaidungpar da iti kayo ti eucalyptus.
Naitaray a dagus dagiti biktima iti Dingras District Hospital ngem agpada dagitoy a nideklara a dead on arrival gapu kadagiti sinagaba da a nakana a sugat kangrunaan na iti ulo da.
Kinumpirmaran ni Police Capt. Joseph Calderon, ti chief of police iti ili a Dingras a naggapo dagiti biktima iti maysa a paggiinuman ditoy ciudad ti Laoag.
Innayon na a possible a nakaridep ni Duldulao bayat nga agmanmaneho a nangitundan ti pannakadesgrasya da ken ni Javier.
