LAOAG CITY – Naglikudan ni Mrs. Ofelia Fermin, PTA president iti Sarrat North Central School ti naipadanon nga isyu iti Bombo Radyo mainaig ti naibaga na ti maysa a parent a nu awan ti pagbayad na kadagiti obligasyon na ti nasao a pagadalan ket iyakar na laengen ti anak na.
Immunan a naamoan ti Bombo Radyo a nagapa ti agnagan Baldo ken ni Fermin gapu ti 500 a pisos a kontribusyon da para ti family day ken ti CCTV camera nga agbalor iti 50 ribo a pisos.
Segun kenni Fermin, ti nasao a kontribusyon ket nagtutulagan dagiti nagduduma nga homeroom PTA ti nasao a pagadalan a pinaboran met dagiti pada da a nagannak.
Kabayatan na, inpakaammo ti principal ti nasao a pagadalan a boluntaryo ti panagbayad ti nasao a kontribusyon gapu ta adda dagiti nagannak a nagbayad ti 500 a pisos agingga iti sangaribo a pisos idinto nga adda met dagiti saan a nagbayad.
Iti sabali a bangir, kinumpirmaran ti maysa nga agnagan “Jona” nga isuna ti nangibaga ken ni Baldo ti naibaga ni Fermin, nupay nakunana a nga inyangaw na laeng ngem nasair latta ti rikna na.
Innayon ni Jona a mabalin a sabali ti nagawatan ni Baldo ti naibaga na isut gapuna a nakisinnungbat ken ni Fermin.
