LAOAG CITY – Inrakurak ti Philippine National Police (PNP) umabot iti 294 dagiti paggasolinaan a temporario a nagserra iti intero a pagilian agingga idi kalman, Abril 18 gapu iti panagngato ti presio ti langis gubuay iti gubat iti Middle East.
Inbatad ti Philippine National Police a banbantayanda ti pakabuklan a 14,257 gas stations iti pagilian.
Manipud Marso 1 agingga ita nga aldaw, nakaipilan dagiti otoridad ti 27 a kaso mainaig iti fuel violations pakairamanan ti 7 a kaso ti hoarding, 1 a kaso ti profiteering ken 19 pay a kaso ti ilegal a panagurnong, transportasion ken panaglako kadagiti produkto a petrolyo.
Idi Abril 17, nangiwayat ti operasion iti Barangay Santa Ana, Tubay, Agusan del Norte a nagresulta iti pannakaarestar ti dua a lallaki nga addaan ti alyas nga “Ando” ken “Bote” gapu iti maipahgarup nga oil pilferage wenno “paihi.”
Basar iti imbestigasion, natiliw dagiti suspek kabayatan nga iyak-akar ti gasolina manipud iti tanker truck nga agturong kadagiti drum ken babassit a pagikabilan para iti ilegal a panaglako no sadinno a ti truck ket rumrummuar nga aggapu idiay Cagayan de Oro City.
Nakumpiskar iti operasion ti maysa a trailer tanker nga adda ti kargana a petrolyo ken maysa a drum nga adda ti mapatta-patta a 180 a litro ti langis.
Mapatta-patta nga adda ti ₱6.62 milyon ti balor dagiti nakumpiskar nga ebidensia.
Makasoan dagiti suspek iti babaen ti Presidential Decree No. 1865 a nangamendar iti Batas Pambansa Blg. 33.
