LAOAG CITY – Naikkaten dagiti barangay checkpoints ditoy ciudad ti Laoag kalpasan a naikabil iti babaen ti General Community Quarantine (GCQ) manipod iti Modified Enhanced Community Quarantine (MECQ).
Daytoy ti inbaga ni Doctor Charito Malicad, City Information Officer ditoy ciudad ti Laoag.
Inlawlawag ni Malicad nga iti babaen ti GCQ ket saanen a kasapulan dagiti Barangay checkpoints gapu ta awan metten ti pass slip ken dadduma pay a dokumento a nasken nga ipakita dagiti sumrek iti maysa a barangay.
Maipalagip nga immuna a naikabil iti babaen ti Enhanced Community Quarantine (ECQ) ditoy ciudad ti Laoag kalpasan na ket naipababa iti MECQ agingga nga idi rabii ket naikabilen iti GCQ.
Innayon na nga awan payen ti No Movement Day iti aldaw ti domingo.
Nupay kasta, nagpanawagan ni Malicad kadagiti residente ditoy ciudad ti Laoag nga iti baet a naipanen iti GCQ ti ciudad ket itultuloy a suruten dagiti minimum health protocols kas ti panagusar ti face mask, obserbaren ti social distancing ken no awan ti napateg nga aramiden iti ruwar ket agtalinaed lattan iti uneg ti balay.
