LAOAG CITY – Nagsagaba ti sugat ti maysa a nakabisikleta a menor de edad kalpasan a nadungpar ti naka-motorsiklo iti Paoay-Balacad road bisinidad ti Barangay 2, San Roque iti ili ti Paoay.
Ti biktima ket agtawen ti 17 ken residente iti Barangay Callaguip iti nasao nga ili idinto a ti driver ti motorsiklo ket ni Christian Zedrick Agbayani y Agreda, addaan iti umno a tawen ken taga Barangay San Pedro iti ili ti Vintar.
Iti imbestigasyon ti PNP-Paoay, sarsarunwen ti nakamotorsiklo ti nakabisikleta ken idi agpakannigid a direksyon ti biktima a sumrek iti Barangay Callaguip ket maipagarop a nagderderetso ti motorsiklo rason a nadungpar na daytoy.
Gapu iti daytoy, agpada a natulid ti nakabisekleta ken nakamotorsiklo no sadinno a nagsagaba ti sugat iti akin-kannigid a siko ti menor de edad idinto a gasgas laeng iti dakulap ni Agbayani.
Agpada a napaagasan iti Rural Health Unit (RHU) iti nasao nga ili dagiti dua ken manamnama a pagsasaritaan da ita nga aldaw ti napasamak.
