LAOAG CITY – Natay ti maysa nga estudyante kalpasan a naitapwak ti inturong na motorsiklo iti irigasyon a paset ti Brgy. 39 Pasiocan iti ili a Bacarra.
Nabigbig ti biktima a ni Shan Rhei Benigno y Pasion, agtawen ti 20, estudyante ti Data Center College ken residente iti Brgy. 10 iti nasao nga ili.
Segun kenni P/Major Rommel Ramos, hepe ti PNP Bacarra, kadwa ti biktima iti kasinsin na a ni Stephen Ramiscal a kina-convoy na nga agawid kalpasan a naggapo dagitoy iti maysa a pagi-inuman.
Basar iti imbestigasyon ti PNP, bayat a daldalyasaten dagiti agkasinsin ti highway ket dita a naawanan ti kontrol ti manibela ti biktima iti kurbaan a paset ti kalsada rason a naitapwak daytoy iti irigasyon.
Gapu iti dayta, nagsagaba ti biktima iti sugat ti ulo na rason a dagus a naitaray iti Governor Roque Ablan Sr. Memorial Hospital ngem naideklara a dead on arrival.
Kuna ni Ramos a posible a napaspas iti taray ti motorsiklo ni Benigno.
Malaksid iti dayta, maysa pay kadagiti rason ti nasao nga aksidente ket gapu iti kinakurang ti silaw ken signages ti nasao a lugar.