LAOAG CITY – Nagpanawagan ti National Citizens’ Movement for Free Elections (NAMFREL) iti Kongreso ken iti Executive branch a pagtalinaeden ti mandato ti konstitusyon para iti regular ken umiso a panawen ti eleksyon.
Naiget a kontraen ti grupo ti aniaman nga addang a pannakaitantan ti Barangay at Sangguniang Kabataan Elections (BSKE) intono Nobyembre 2026.
Segun iti National Citizens’ Movement for Free Elections, ti eleksyon ket saan a rumbeng nga itantan a kas ti kalikagom dagiti adda iti turay gapu ta daytoy ket karbengan dagiti umili.
Nagballaag pay ti grupo a ti panangiyakar ti pondo ti Commission on Elections (COMELEC) iti sabali a programa ket mailabsing iti Konstitusyon ken pangta iti kinawaya ti institusyon.
Inpetteng ti National Citizens’ Movement for Free Elections a ti krisis iti Middle East ket saan nga umdas a rason tapno itantan ti eleksyon.
Kinondenar da pay ti maulit-ulit a pannakaitantan ti Barangay at Sangguniang Kabataan Elections a maipagarop nga agbalbalin a wagas tapno agtalinaed iti pwesto dagiti opisyal.
Ginutigot ti National Citizens’ Movement for Free Elections ti amin a Pilipino nga agbalin nga alerto ken ilaban ti karbengan nga agbotos iti naikeddeng a panawen.
