LAOAG CITY – Agtultuloy ti maiyus-uswat a preparasyon idiay United Kingdom para iti pannakaitabon ni Queen Elizabeth II intono lunes, Setyembre 19, 2022.
Segun ken ni Bombo International News Correspondent (BINC) Jona Dawn iti Scotland, opisyalen a naideklarar ti National day of Mourning ken national bank holiday intono Lunes no sadinno nga awan ti serrek kadagiti pagadalan ken trabaho.
Kuna na a tinawen nga awanen ti serrek iti trabaho ken kadagiti pagadalan tunggal setyembre 19 idiay United Kingdom.
Inrakurak pay ni Dawn nga iti kaaldawan ti tabon ti reyna ket possible a kaadoan a tattao idiay United Kingdom ket nakatutuk iti telebisyon gapu ta live a mabuya da ti sibubukel a pasamak.
Innayon ni Dawn nga ado met dagiti Pilipino idiay London a mapan makipilpila tapno makita iti maudi a gundaway ken mangipaay ti respeto ken ni Queen Elizabeth II a 70 a tawen a nagserbi idiay United Kingdom.
Mainaig iti daytoy, kuna ni Dawn a ti saanda pulos a malipatan iti panagserbi ni Queen Elizabeth ket dagiti napipintas a benepisyo a maipapaay kadagiti international nurses kangrunaan na kadakuada a Pilipino.
Naamoan a kaadoan a populasyon dagiti Pilipino idiay United Kingdom ket nurses ken agtrabtrabaho kadagiti ospital ken healthcare facilities.
