LAOAG CITY – Inbatad ni Mr. Gerry Fermin, mangidadaulo ti City Disaster Risk Reduction and Management Office ditoy ciudad ti Laoag nga ado dagiti nagtawag iti hotline da nga agparescue gapo iti iduduprak ti Bagyo Egay.
Segun kenni Fermin, ado dagiti natulid a poste ken puon ti kaykayo gapo iti kapigsa ti angin.
Inlawlawag na nga adda ti maysa nga indibidual a rinespondean da iti Barangay Tangid no sadinno ket natrap iti ballasiw ti karayan gapo ta saan a makalasat daytoy ken ti dingwen na.
Kunana nga adda pay ti nagpatulong kadakuada tapno maisalakan dagiti taraken na da baboy ken baka ngem nasken a saan a mairisgo ti biag dagiti rescuers gapo iti liway dagiti residente.
Kunana a nakadeploy met amin a personnel ti response cluster ditoy ciudad ti Laoag.
Mainaig iti daytoy, inadmitir ni Fermin nga adda ti pangkurang ti personnel ti rescue team ken road clearing gapo iti kaado ti agkiddaw ti tulong kadakuada.
Kabayatanna, nakasagana met dagiti relief goods nga ipaay da kadagiti apektado kangrunaan na kadagiti naibakwit a tallo a pamilya wenno 16 nga indibidual.
