LAOAG CITY – Inpakaammo ni Laoag City Disaster Risk Reduction and Management Officer Mr. Jerry Fermin nga adda ti nasurok 2 milyon a pisos ti inisyal a balor ti perdision iti benneg ti agrikultura ditoy siudad ti Laoag gapu iti iduduprak ti Bagyo Goring.
Segun kenkuana, kangrunaan a naapektaran ti nasao a bagyo ti pagay nga umabot iti 2 milyon a pisos, mais ket 7 ribu a pisos idinto a ti high value crops ket 2 ribu a pisos.
Inlawlawagna a manarimaan pay laeng nga ipinpinal ti City Engineering Office iti datos pakaseknan iti balor ti perdision iti benneg ti imprastraktura.
Malaksid iti daytoy, kunana nga adda ti 40 a pamilya wenno 136 nga indibidual ti nagibakwit iti Brgy. Gabu ditoy siudad gapu iti matepteppang a dike.
Inbagana a boluntario dagiti maseknan a nagibakwit gapu ta naadalan dagitoyen iti napalabas a Bagyo Egay a nangitunda met ti nakaro a layos.
Inbatadna nga adda ti maysa a pagtaengan a posible a mairaman a maiyanod ti napigsa nga ayos ti danum gapu iti agtultuloy a panagtudtudona.
Nupay kasta, inpalgakna a nagtitinnulong dagiti residente ken dagiti otoridad babaen ti panag-deliver ti City Engineering Office ti darat ken batbato a nausar a temporario a manglapped ti pannakadadael ti nadakamat a balay.
Innayon ni Fermin nga agarup 100 a metro ti kaatiddog ti apektado ti nateppengan a dike.
