LAOAG CITY – Naipaiman kadagiti 2,239 a mannalon ti tsekeda kalpasan nga inaprubaran ti Philippine Crop Insurance Corporation (PCIC) ti inpakaamo da a perdisyon dagitoy bayat kadagiti naglabas a kalamidad.
Daytoy ket kalpasan a dimmalan ti validation dagiti nadadael a kapagayanda kalpasan ti idadalapos ti bagyo ompong.
Dagiti mannalon a naibunongan ket manipud ti Dingras, Solsona, Banna, Piddig, San Nicolas, Paoay, Burgos, Dumalneg, Currimao, Pasuquin, Bacarra, Vintar , ken Ciudad ti laoag ken Batac.
Mainaig iti daytoy, immapela ni Mr Raul Servito, OIC Regional Manager ti PCIC a saan koma nga agiinnapal dagiti mannalon gapu ta saanda nga agpapada ti maalada a kantidad.
Inlawlawagna a nagduduma ti maawatda a kantidad gapu ta agpannuray no kasano ti kalawa ti nadadael a mula kadagiti kataltalonanda.
