LAOAG CITY – Inbatad ni Mr. Ismael Ali, ti Presidente ti Ilocos Norte United Muslim Association (INUMA) nga adda ti nasurok 50 a pamilya iti Muslim Compound ti naibakwit gapo iti Bagyo Egay.
Segun kenni Ali, naipan dagiti nadakamat nga indibidual iti Central Terminal ken iti pagadalan.
Inlawlawag na a dagiti nababa ti pagtangen na ket isu ti masansan a malayos ken agbakwit no kastoy nga adda ti napigsa a tudo wenno bagyo.
Kunana a ti sumsumrek a danom iti Muslim Compound ket aggapo iti karayan.
Dinakamat na pay a sumagmamano kadagiti pagtaengan ket naitayab ti galba na gapo iti kapigsa ti angin.
Kabayatanna, nagyaman met ni Ali iti lokal a gobierno ditoy ciudad ti Laoag ken gobierno probinsyal iti panangmonitor da ken maipaay a tulong kadakuada.
