LAOAG CITY – Naisubli ti nasurok 60 a milyon a pisos nga ummunan a naikkat iti Annual Budget ita a tawen iti ili ti Vintar.
Daytoy ti kinumpirmaran ni SK Federated President Howard Dante Mabanag ken chairman ti Committee on Appropriations and Finance iti nasao nga ili.
Segun kenni Mabanag, naisubli daytoy kalpasan a naipaiman iti konseho dagiti kidkiddawen da a dokumento wenno attachment para iti kiddaw a pondo dagiti sumagmamano a departamento.
Inlawlawag na nga inur-uray da dagiti napapateg a dokumento ken idi nakumpleto ket isu ti pannakaaprubar na bayat ti session da idi kalman.
Karaman kadagiti departamento nga inuray da a mangisubmitir ti dokumento ket ti Engineering ken Motor pool.
Mainaig iti daytoy, kuna ni Mabanag a manipud iti nasurok 60 a milyon a pisos ket naisubli kadagiti sumagmamano a departamento ken naited kadagiti patyen da nga ad-adda a makasapol iti ad-ado a pondo kas iti livelihood program ti ili, ken ti health services, AICS ken dadduma pay.
Kabayatanna, inbatad ni Mabanag nga iti Office of the Mayor ket addaan ti 100 a ribo a pisos a travelling allowance idinto nga agpapada met a 30 a ribo a pisos para kadagiti amin a departamento pakairamanan ti opisina ti Bise Mayor ken Sang. Bayan.
Iti agdama, kunana nga urayen da ti panangaprubar ni Mayor Larissa Foronda ti inaprubaran da a pondo.
Maipalagip nga in-veto ti mayor ti inaprubaran ti Sang. Bayan ti Annual Budget iti nasao nga ili gapo ta patien ti ehekutibo a quarterly budget ti inaprubaran ti konseho.
