LAOAG CITY – Dinarusdos ti maysa a Montero ti nasurok 10 a motorsiklo a nakaparking iti sango ti maysa a pasdek negosyo iti paset ti Barangay Pasiocan iti ili ti Bacarra.
Segun kenni Police Senior Master Sergeant Pastor, ti chief investigator iti Philippine National Police iti ili ti Bacarra, ti nangiturong iti nasao a Montero ket taga Metro Lapaz.
Kuna na nga aggapo ti Montero ditoy ciudad ti Laoag ken aglikko koma iti kannawan iti by-pass road a kumamang iti Brgy. Pasiocan iti nadakamat nga ili.
Nupay kasta, imbes a ti preno ket ti accelerator ti napaddakan ti driver isut gapuna a nadarusdos na dagiti nakaparking a motorsiklo a kukua dagiti agtrabtrabaho iti nasao a pasdek negosyo.
Inpakaammo ni Police Senior Master Sergeant Pastor nga addan ti panagsasarita dagiti maseknan no sadinno nga inkari ti driver ti Montero a patarimaan na dagiti nadadael a paset dagiti nadarusdos na a motorsiklo.
Naamoan a ti driver ti nasao a Montero ket agsursuro paylaeng nga agmaneho.
