LAOAG CITY – Inrakurak ni United States President Donald Trump nga inbilinna ti United States negotiators a saan a ganaten ti posible a katulagan iti Iran iti baet kadagiti damag nga asidegen a magun-od ti maysa a deal tapno mapalag-an ti tension iti Middle East.
Iti maysa a post iti Truth Social, kuna ni Trump a naurnos ken “constructive” ti taray ti negosasion ngem nasaysayaat a saan daytoy a ganaten.
Inlawlawagna nga agtalinaed ti blockade ti Estados Unidos kadagiti pantalan ti Iran agingga a makumpleto, mapirmaan ken mapatibker ti aniaman a katulagan.
Maipalagip nga inpatungpal ti blockade manipud idi Abril 13 kagiddan ti kumarkaro a tension iti nagbaetan ti Estados Unidos ken Iran iti Strait of Hormuz a maysa a napateg a ruta ti world supply ti langis.
Kabayatanna, kuna ti pannakangiwat ti Foreign Ministry ti Iran a ni Esmaeil Baqaei a dandanidan a makabukel ti maysa a “framework agreement” a bukbuklen ti 14 a probision kas paset ti peace talk.
Iti baet daytoy, saan a nakaliklik iti isyu ti baro a katulagan no sadinno a rimmuar ti sumagmamano a detalye iti posible a katulagan nga insigida a nagdanag ti sumagmamano nga agpanpanday linteg ken dati nga opisial iti Washington.
Immunan nga inrakurak ni Trump a ti katulagan ket dandanin a malpas ngem masapul pay ti pinal a panagsinnarita sakbay daytoy a naan-anay a maipatungpal.
