LAOAG CITY – Naipatungpal ti preemptive evacuation a nakaibakwitan ti nasurok a 100 a pamilya manipod iti Barangay Pancian ken Barangay Pasaleng iti ili ti Pagudpud kalpasan a naibayug ti signal number 4 ti bagyo Marce ti nasao nga ili.
Daytoy ket basar ken ni Mr. Hendrick Pedronan, ti mangidadaulo iti Municipal Disaster Risk Reduction and Management Council iti nasao nga ili.
Inpasigurado ni Pedronan nga adda ti makaumanay a food packs a maipaay kadagiti evacuees agingga a saan a makapanaw ti bagyo Marce.
Kabayatanna, inpakaammo ni Pedronan a temporaryo a pinaserraan ti Department of Public Works and Highways ti kalsada iti paset ti Sitio Banquero, Barangay Pancian iti ili ti Pagudpud gapu iti napasamak a landslide.
Ti temporaryo a pannakapaserra ti nasao a kalsada ket nangrugi iti oras ti alas-siete ita a rabii agingga iti alas-siete ti bigat intono bigat, Nobyembre 8, 2024.
Kuna na a gagem ti nagbalin nga addang ti ahensya ket tapno masigurado ti kinatalged dagiti motorista a dumalyasat iti nasao a lugar.
