LAOAG CITY – Ginutigot ni National Bureau of Investigation (NBI) Director Jaime Santiago ni aLyas Totoy nga inaganan na dagiti personnel ti ahensiya a maipagarop nga adda ti pakainaigan na iti panagpukaw dagiti naruay a mammallot.
Immunan nga inbatad ti kontrobersyal a whistleblower ti maipagarop a pannakairaman ti sumagmamano a personnel ti National Bureau of Investigation iti isyu ti panagpukaw dagiti mammallot, karaman dagiti pulis ken sumagmamano a dakdakkel a personalidad.
Inpetteng ni Director Santiago a saan a mairugi ti kaso no awan dagiti partikular a nagan wenno pakabigbigan dagiti maitudtudo a karaman iti panagpukaw dagiti naruay a mammallot.
Innayon na a no agkedked ni alyas Totoy a mangdakamat ti nagan ket sigurado a saanen a maimbestigar ken amin a personnel ti National Bureau of Investigation ket maibilang da a suspek iti nasao a krimen.
Maipalagip nga inkari ti National Bureau of Investigation a nakasagana a tumulong iti pannagna ti imbestigasyon nga idadaulwan ti Philippine National Police (PNP) ken Department of Justice (DOJ).
Innayon ni Santiago a nakasagana pay ti ahensiya a mangiyuswat ti forensic procedures kas ti DNA testing, lie detector test, ken dadduma pay a proseso tapno makatulong iti panangbigbig kadagiti pudno nga adda iti likudan dagiti inbutaktak ni alyas Totoy.
