LAOAG CITY – Inpasigurado ti National Bureau of Investigation Director Melvin Matibag a nakasaganan ti ahensia nga arestaren ni Senador Jinggoy Estrada uray adda daytoy iti uneg ti Senado.
Inrakurak daytoy ni Matibag kalpasan a nangiparuk-at ti warrant of arrest ti Sandiganbayan idi Biernes, Mayo 29 kontra ken ni Estrada kalpasan a nairaman daytoy iti maanomalya a flood control projects.
Maipalagip a basar iti Office of the Ombudsman ket umabot iti P573 million a gatad ti kickbacks ti inawat ni Estrada nga aggapu iti nasao a proyekto.
Kuna ti Ombudsman a “no bail” ti naipila a plunder case kontra iti Senador.
Inyarig ni Matibag ti situasion iti pananggandat dagiti otoridad nga ipatungpal ti arrest warrant kontra ken ni Senador Ronald dela Rosa idi Mayo 11.
Inpanagetget ti National Bureau of Investigation Chief a no ti pagibasaran dagiti argumento nga addaan ti lokal a warrant ti naakusaran ket nalawag a legal ti aramiden a panangarestar ken ni Estrada uray adda pay laeng daytoy iti uneg ti Senado.
Immunan nga inpakaammo ti National Bureau of Investigation nga addan dagiti immunan a kaso no sadinno a naarestar dagiti agpanpanday linteg uray nakatugaw pay laeng dagitoy iti puesto pakairamanan da dati a Senador Leila de Lima, Antonio Trillanes IV ken ti pimmusayen a ni Juan Ponce Enrile.
