LAOAG CITY – Inbatad ti National Capital Region Police Office (NCRPO) a possible nga ad-ado a pulis ti iwaras da ken mangipatungpal ti naig-iget a seguridad iti maikatlo nga State of the Nation Address (SONA) ni Presidente Ferdinand Marcos Jr. intono Hulyo ita a tawen.
Segun ken ni National Capital Region Police Office chief Police Major General Jose Melencio Nartatez Jr., a sumagmamano a lawas sakbay ti State of the Nation Address, a naituding a maiyuswat intono Hulyo 22 ket agsaganan dagiti kameng ti pulisya kadagiti security operations iti Batasang Pambansa iti Quezon City, karaman dagiti kaparanget na a lugar ken rehiyon.
Kuna ni Nartatez nga iti napalabas a tawen ket umabot iti 22 a ribo a kameng ti pulisya ti naiwaras ngem kalikagom da a manayunan daytoy a bilang, agdepende iti sitwasyon ken napapateg nga element ti impormasyon nga agtultuloy a dumandanun kadakuada.
Innayon na nga apaman a madanun ti oras ti alas-dos ti malem intono Hulyo 22 ket masapol a nawadan ti kalsada, ken no kasapul a saan da nga usaren ti zipper lane tapno makastrek ken makaruwar iti Batasang Pambansa ket aramiden da daytoy.
Pinalagipan met ti National Capital Region Police chief dagiti agplanplano a mangiyuswat ti tignay protesta a saan nga agpoor ti aniaman nga effigies tapno saan a sumango iti aniaman a kaso.
Maipalagip a kalpasan ti maikadwa nga State of the Nation Address ni Marcos iti napalabas a tawen ket nangipila ti reklamo ti Quezon City Police District (QCPD) kontra ken ni Bagong Alyansang Makabayan (Bayan) Secretary General Renato Reyes ken dadduma pay gapu iti panagpuur da ti effigy ti Presidente kas protesta da.
Inawagan met ni Reyes ti reklamo kas maysa nga “harassment suit,” ken inpetteng na a saan a napan nagatendar iti nasao a rally kagiddan ti panangipetteng na nga awan ti dakesna ti panagpuur ti effigy gapu ta paset daytoy ti protektado a nawaya a panangipeksa ti marikrikna.
