LAOAG CITY – Indeklarar ti National Disaster Risk Reduction and Management Council (NDRRMC) ti Blue Alert status kas panagsagsagana para iti May 12 National and Local elections.
Kayatna a sawen daytoy ket kagudua kadagiti disaster officials ket naka-standby tapno adda ti dagus a agresponde iti aniaman nga emergency.
Ti Office of Civil Defense (OCD) ket nangiparuk-at ti memorandum a mangituding ti Blue Alert status nangrugi iti oras ti alas-otso ti bigat idi kalman, Mayo 9 agingga intono Mayo 14 tapno masigurado a naurnus ti koordinasyon dagiti ahensya iti panawen ti eleksyon.
Agbantay met iti National Disaster Risk Reduction and Management Council (NDRRMC) Operations Center dagiti opisyal manipod iti Armed Forces of the Philippines (AFP), Bureau of Fire Protection (BFP), Philippine Coast Guard (PCG), ken Philippine National Police (PNP) tapno adda ti dagus nga agresponde kadagiti insidente ken kiddaw manipod iti regional disaster councils.
Malaksid iti daytoy, banbantayan pay ti Philippine National Police dagiti lugar nga addaan dagiti nairekord a kinadamsak mainaig iti eleksyon.
Nagpanawagan ti Office of Civil Defense iti publiko nga agtalinaed nga alerto ken makitinnulong kadagiti otoridad tapno masigurado ti kapya, kinatalged ken naurnus nga eleksyon.
