LAOAG CITY – Nakairekord ti National Disaster Risk Reduction and Management Council (NDRRMC) ti dua nga indibidual a natay idinto a dua ti mapukpukaw kalpasan ti iduduprak ti bagyo Ramil.
Segun iti NDRRMC, adda ti pakabuklan a 26,878 nga indibidwal ti naibakwit gapu iti bagyo.
Inbatad ti NDRRMC a dagiti evacuees ket manipod kadagiti lugar ti Eastern Visayas, Bicol Region, Cagayan Valley ken Calabarzon.
Umabot iti pakabuklan a 20,041 nga indibidwal ti naapektaran ti nasao a bagyo no sadinno a 5,909 ti naikabil kadagiti 102 nga evacuation centers.
Adda met ti pakabuklan a P274,026 a balor ti tulong a naibunong ti gobierno kadagiti apektado a pamilya.
Nairekord pay ti 13 a lugar iti MIMAROPA ken Eastern Visayas a nalayos gapu iti bagyo.
Agtultuloy ti isaysayangkat nga assessment ti NDRRMC iti pakabuklan a danyos iti agrikultura ken iti imprastraktura gapu iti bagyo Ramil.
