LAOAG CITY – Tiniliw dagiti kameng ti Philippine National Police (PNP) ti maysa a lalaki kabayatan ti papanna panangala koma ti police clearance ditoy ciudad ti Laoag.
Daytoy ket kalpasan a naduktalan iti data base ti kwerpo ti pulisya nga addaan daytoy ti alias warrant of arrest gapu iti kaso na a reckless imprudence resulting to serious physical injuries.
Nabigbig daytoy a ni Mr. Wilfredo Borlaza y Domingo, agtawen ti 41, negosyante, naasawaan ken residente iti Barangay 55-A, Barit ditoy ciudad ti Laoag.
Ti nasao nga alias warrant or arrest ket inparuk-at ni PRESIDING JUDGE NADIA S. DIUMANO iti MTCC iti Palilla-Jalajala, Palilla, Rizal a napetsaan ti Agosto 8, 2019.
Nairekomendar ti 6 a ribo a pisos a piyansa ni Barlosa para iti temporaryo a pannakawaya-waya na.
Inadmitir ni Borlaza nga adda ti nakairamanan na nga aksidente iti probinsya ti Rizal ngem nakiareglo iti nagbalin a biktima na isut gapuna a masdaaw no apay nga adda pay laeng ti warrant of arrest na.
