LAOAG CITY – Possible a ti Netherlands ti agserbi nga “host country” wenno pagilian a mangawat ken ni dati a Presidente Rodrigo Duterte no palubusan ti International Criminal Court (ICC) a temporaryo a makaruwar iti pagbaludan.
Daytoy ti inrakurak ni Atty. Maria Kristina Conti, ti assistant to counsel iti International Criminal Court.
Segun ken ni Atty. Conti, nailanad iti court records nga umuna nga iruwar ti dati a Presidente iti Dutch territory gapu ta ditoy metlaeng a masarakan ti International Criminal Court.
Adda metten dagiti naisingasing a mabalin nga agtalinaed ti dati a presidente iti Netherlands iti babaen ti house arrest imbes nga umakar paylaeng iti sabali a pagilian.
Inpetteng ni Conti a ti kapatgan ket ti panangsurot kadagiti kondisyon imbes a paruwaren ti dati a presidente iti sadinno man a pagilian, karaman ditoy ti saan a panagaramid ti sabali manen a krimen, saan a pannakibiang iti proseso ken panagsubli iti korte iti naikeddeng a panawen.
Innayon pay ni Atty. Conti a mabalin a makaapektar iti desisyon ti International Criminal Court ti ar-aramiden ti pailya Duterte kas kadagiti rakurak ni Vice Presidente Sara Duterte a mangipakpakita iti panagkedked na iti panagbalin a lehitimo ti Korte.
Trinatar pay ni Conti ti rakurak ti Bise Presidente a nakita nga awan ti pootna ni Duterte iti kwarto na.
Immunan nga inlawlawag ti International Criminal Court nga adda dagiti nakasagana a doktor ken nurse tapno masigurado ti kinatalged ken salun-at dagiti detainess ken saan a basta maiparuk-at ken maipublikar dagiti medical records da.
Maipalagip a kiniddaw manen ti kampo ti dati a presidente ti interim release gapu iti nabayagen a pannakaitantan ti proseso ken isyu iti panangtingiting iti salun-at na.
Iti agdama, nakabalud iti The Hague ti dati a Presidente bayat nga iyur-uray na ti naitantan a kumpirmasyon ti kaso kontra kenkuana.
