LAOAG CITY – Natiliw ti number 1 most wanted person, provincial level, ti Ilocos Norte Police Provincial Office babaen ti bileg ti warrant of arrest nga inserbi dagiti kameng ti CIDG Ilocos Norte PFU, CIDG DFU-Eastern Metro Manila, Laoag CPS, PIU INPPO, 1st PMFC, Ilocos Norte MARPSTA, Nueva Era MPS ken Paoay MPS.
Naggapu ti warrant of arrest iti RTC Branch 18, Batac City, Ilocos Norte a napetsaan idi Marso 31, 2017 gapu iti kaso a Murder kontra iti wanted person ken awan ti nairekomendar a piyansa na.
Nabigbig daytoy a ni Abet Duguen y Chavez, agtawen ti 36, Security Guard, ken residente iti Brgy. Uguis Nueva Era, ngem agnanaed iti Orhards Towers Condominium, Amang Rodriguez Avenue, Brgy. Mangahan, Pasig City, Metro Manila no sadinno iti nakatiliwan na.
Nagbiyahen ti grupo dagiti otoridad kadua da ni Duguen manipud Manila tapno isubli da daytoy iti korte a naggapuan ti warrant of arrest.
Maipalagip a naakusaran ni Duguen iti pannakapapatay ni sigud a PO3 Fernando Sensano Sacatrapos Jr, Chief, Intel PNCO iti Paoay MPS, idi Setyembre 1, 2016 babaen ti pannakapalto-paltog na iti Brgy. Salbang, iti ili ti Paoay.
Iti report a nakalap ti Bombo Radyo Laoag idi tawen 2016, naggapu ni Sacatrapus iti maysa a training-seminar ken napalto-paltogan bayat ti panagawid na.
