LAOAG CITY – Inpasigurado ti Malacañang a responsibilidad ti gobierno a pagtalinaeden a natalged ti asinoman a Pilipino nga agsubli iti pagilian pakairamanan ti dati nga agpanpanday linteg a ni Zaldy Co nga immunan a nai-report a naarestar idiay Prague, Czech Republic.
Nupay kasta, inpetteng ni Palace Press Officer Undersecretary Claire Castro a kasapulan pay laeng a paneknekan no adda ti maipatpatungpal a pangta iti biag ti dati nga agpanpanday linteg pakairamanan ti maipagarup a death threat.
Basar iti Palasyo, napateg nga adda ti umdas nga ebidensia sakbay a makaipaay ti nayon a kasiguradoan ngem agtaltalinaed ti kinasagana ti gobierno a mangipaay ti proteksion no kasapulan.
Binabalaw met ni Castro ti rakurak ni dati a presidential spokesperson Atty. Harry Roque ken kwinestionaranna no apay a mamati ti maysa a “fake news peddler,” iti baet nga immunan a nagsaritan ti Presidente ken ti sekretario ti Department of Justice mainaig iti pannakaarestar.
Innayonna a limitado dagiti mabalin nga iparuk-at nga impormasion ti gobierno pakairamanan ti kinaawan ti ladawan wenno video gapu ta adda ti sumagmamano a pagilian ti karaman iti daytoy.
