LAOAG CITY – Inrakurak ni House Committee on Justice chair Gerville Luistro a sobra pay iti probable cause dagiti nakalap nga ebidensia kontra ken ni Vice President Sara Duterte tapno ma-impeach isuna.
Segun ken ni Luistro, inpakita dagiti dokumento a naiprisentar iti impeachment hearing a dakkel ti bank transactions da Vice President Sara ken ti asawana a ni Manases Carpio ket saan nga agtugtugma iti pinagtiponda a pakabuklan a kinabaknang kasta pay ti non-disclosure ti cash ken bank deposits para iti innem a tawen.
Daytoy ket malaksid pay iti notices of disallowances nga inyisyu ti Commission on Audit para iti nagastos a confidential fund ti Office of the Vice President nga agbalor ti pakabuklan a P448 million.
Kunana a daytoy ket panangkumpirmar kadagiti alegasion iti reklamo nga impeachment kontra iti Bise Presidente.
Inbatadna a napaneknekan ti mayorya dagiti miembro ti Justice panel nga adda ti pagibasaran dagiti alegasion iti reklamo basar kadagiti naidatag nga ebidensia iti panagdengngeg.
Naikeddeng nga ammoen ti Justice Committee no adda ti probable cause wenno awan dagiti reklamo tapno iyuli daytoy iti plenario ti Kamara de Representantes tapno pagbubutosan.
