LAOAG CITY – Nagballaag ni Presidente Ferdinand Marcos Jr. a maisardeng ti operasyon ti gobierno no paboran ti Korte Suprema dagiti petisyuner a mangkweskwestyunar iti konstitusyonalidad ti 2025 General Appropriations Act (GAA).
Inpetteng ni Marcos a ti petisyon ket maipagarop a paset ti destabilisasyon kontra iti administrasyon na.
Ti nasao a petisyon nga inpila da Davao Rep. Isidro Ungab, dati nga Executive Secretary Vic Rodriguez, ken dadduma pay ket nailanad ditoy nga adda ti nalabsing iti konstitusyon ti 2025 General Appropriations Act, karaman ditoyen ti maipagarop a blangko a pondo iti bicameral report.
Karaman kadagiti respondent iti kaso da House Speaker Martin Romualdez, Senate President Francis Escudero, ken Executive Secretary Lucas Bersamin.
Nupay kasta, kuna ni Presidente Marcos a kumpiyansa iti legal a pagtaktakderan, basar iti balakad ni Solicitor General Menardo Guevarra a nangipetteng nga adda ti natibker a pundasyon ti konstitusyonalidad ti 2025 budget.
