LAOAG CITY – Inpetteng ni Atty. Ferdinand Ignacio a mabalin a mapilaan ti kaso ti barangay officials nga agkedked nga agtestigo iti anti-illegal drug operation.
Segun kenni Ignacio, masapol a 24/7 ket sidadaan ti barangay officials nga agtrabaho kangrunaan na iti sakop da ken saan a mabalin nga ibaga a saan a nakaduty.
Inbatad na a ti mabalin nga ipila a kaso kontra iti barangay official nga agkedked nga agtestigo ket Dereliction of Duty nangruna no awan met ti valid a rason na nangruna ket ammo amin dagitoy ti trabaho da pakaseknan iti operasyon ken iti BADAC.
Inlawlawag na a nasken laeng nga aramiden ti maysa nga opisyal ti barangay ti trabaho na nga isu ti mangipasigurado a ti procedure ket nasurot wenno awan ti iligal a napasamak sipud nangrugi agingga a malpas ti operasyon.
Inpalgak pay ni Atty. Ignacio a mabalin met nga awaten ti korte ti maipresentar nga ebidensya iti laksid nga awan ti maysa kadagiti testigo no laketdi mailawlawag a nalaing no apay a kurang ti testigo kabayatan ti operasyon.
