LAOAG CITY – Nasakit ti nakem dagiti opisyal ti Barangay Cabusligan iti ili ti Bacarra iti maysa a lalaki gapu ta maipagarop a saan a napintas ti pannakilangen na kadakuada kabayatan iti panangisayangkat da ti checkpoint kas paset ti maipatpatungpal nga Enhanced Community Quarantine (ECQ) gapu iti covid-19.
Nabigbig daytoy a ni Darell Camarao, technician iti maysa nga AM Radio Station ken residente met laeng iti nadakamat a barangay.
Iti palawag ni Barangay Kagawad Rolando Tumacder, sinita da ni Camarao gapu ta nakamotorsiklo nga awan ti facemask na ken adda pay ti inlubbon na a babai.
Inbatad na a kalpasan nga inbaga ni Camarao a mapan agubra iti baet a daytoy ket nakapawad ket inikkat dan ti barikada tapno makapagna daytoy.
Apaman a naikkat ti barikada ket kellaat na lattan a pinataray ni Camarao ti motorsiklo na ken kabayatan nga umad-adayo ket talya-talyawen na ida ken adda ti ibagbaga na.
Innayon ni Kagawad Tumacder a kalpasan ti sumagmamano a gundaway ket nagsubli ni Camarao kadwa na ti pamilya na ket ditoyen a maipagarop a nagsisinnungbat da.
Gapu ta nasakit ti nakem dagiti opisyal ti barangay ket nagkamang da iti kwerpo ti pulisya isut gapuna nga inimbitaran ti PNP ni Camarao ngem saan a napan nagparang.
Inpakaammo ni Brgy. Chairman Reynaldo Macuray iti Barangay Cabusligan a tinawagan na ni Camarao a mapan makisarita tapno maurnus ti napasamak ngem maipagarop a saan a kayat ti makisarita ti naud-udi iti kwerpo ti pulisya.
Kabayatanna, iti biang ni Camarao, inbaga na a kanayun a sitsitaen dagiti maseknan nga uray idi nakahelmet ken nakaface mask ket sinita da pay laeng isut gapuna nga iti inaramid na ket inikkat na jacket ti na ken inpakita na ti logo ti bado na iti pagtrabtrabahoan na a radio station
Innayon na a kalpasan iti daytoy ket insurat na iti sango ti motorsiklo na a daytoy ket media.
Naamoan nga awan metten ti plano dagiti opisyal iti Barangay Cabusligan iti ili ti Bacarra nga agpila ti reklamo kontra ken ni Camarao ngem kayat da laeng a makapagsasarita da isut gapuna nga uliten danto manen nga imbitaran ti maseknan.
