LAOAG CITY – Inpakaaammo ti nabirngasan nga Optimum star a ni Claudine Barretto kadagiti fans-na a fake news ti agwarwaras ita iti online maipapan iti reaksionna kadagiti fans a bumisbisita iti nakaitabonan ti dati a boyfriend-na ken sikat a 90’s actor a ni Rico Yan.
Iti online account ti aktres, inpakitana ti screenshot ti maysa nga art card ken nag-caption ti “FAKE NEWS”. Makita ditoy ti ladawanda ken ni Rico nga adda ti nakasurat a “Please respeto kay Yan.”
Naammoan a kadagiti naglabas nga aldaw ket napagsasaritaan iti online ni Rico kalpasan a nagwaras dagiti sumagmamano a bidyu iti online pakairamanan ti time lapse video ti maysa a Gen Z.
Maipalagip a 22 a tawenen ti napalabas sipod pimmusay ti aktor idi Marso 29, 2002 kabayatan iti Holy week vacation daytoy idiay Puerto Princesa, Palawan gapu iti acute hemorrhagic pancreatitis wenno bangungot iti tawenna a 27.
