LAOAG CITY – Naiget nga inpetteng dagiti abogado dagiti innem nga empleado ti Ilocos Norte a naawagan nga Ilocos 6 a masapol a suruten ti House Sgt. at Arms ti release order ti Court of Appeals.
Segun kenni Atty. Vicentito Lazo, uray adda ti motion for reconsideration ti congressional committee a makin-iggem ti issue a sangsanguen ti Ilocos 6 ket saan a makaapektar iti release order ti CA.
Immuna iti daytoy, nangipila ti MR ti Office of the Solicitor General no sadinno a nakalanad nga awan ti hurisdiksiyon ti CA iti contempt order kontra kadagiti empleado.
Inbatad dagiti abogado ti Ilocos 6 nga status quo ante order laeng ti mabalin a makalapped iti order of release nga inparuk-at ti CA.
Ti Ilocos 6 ket agtultuloy a nakadetene iti holding area ti House of Representatives kalpasan a saan manen a binigbig iti maikadua a gundaway ti House Sgt. at Arms ti nasao nga order of release.
